FAQ’s

Sun cie muessi pa mëter verda sce compre n radio digitel?

Dassëssais cialé che l ebe l standard DAB+ (ajache chësc ie retrocumpatibl cun l standard DAB y nsci possen audì  limpea duc i programs trasmetui).

Cie possi pa fé sce mi radio DAB ne va nia plu?

Per prim pudëssen cialé de otimisé l’antena y de spusté l radio (per valivé ora cërta mudazions de rezezion). Sce chësc ne juëssa nia pudëssen, do avëi destacà la rë, fé na crissa nueva di programs. Pra n valgun aparac iel dan la crissa di programs nce de bujën de fé n “reset” o de jì de reviers ala mpustazion de fabrich dl njin. Tlo cumpedons su n valguna manieres de pruzedura:

  • Tenì druchei i poms “Taste Scan”, “Seek” o “Tune” plu giut che trëi secunc nchin che la crissa cumpleta scumëncia (l cumparësc la scrita “Scanning” o “Auto Scan”).
  • Tenì druchei i poms “Taste Scan”, “Seek” o “Tune” plu giut che trëi secunc y destaché per curt tëmp la rë (tré ora l stecher y l ficé inò ite). La crissa scumëncia automaticamënter (l cumparësc la scrita “Scanning” o “Auto Scan”).
  • Crì ora “Trim List” cun l pom da mené ntëur (“Tune” / “Select”) y cunfermé. Pona scumencé la crissa automatica (cun “Scanning” o “Auto Scan”).
  • Tenì druchei i poms “Autotune” o “Auto Scan” y ON/OFF tl medemo mumënt nchin che l cumparësc l sotmenù, pona cunfermé “Reset” y aspité che la crissa automatica fine (l vën mustrà su “Scanning” o “Auto Scan”).
  • Druché sun l pom ”Setup”, pona crì ora “Reset System” y cunfermé. La crissa di programs vën scumenceda automaticamënter (l vën mustrà su “Scanning” o “Auto Scan”).
  • Druché l pom “Menù”, pona druché sun “System Reset” y cunfermé cun “Select” o “Enter”. La crissa di programs scumëncia automaticamënter (l vën mustrà su “Scanning” o “Auto Scan”).
  • Tenì drucà plu giut l pom “Options” nchin che l cumparësc la scrita “Factory Reset” y cunfermé cun “Yes”. La crissa di programs scumëncia automaticamënter (n vëij la scrita “Scanning” o “Auto Scan”).
  • Giaurì l menù cun l pom “Info”, pona crì ora “Factory Reset” cun i poms SU/JU, l cumparësc “Confirm Reset”, śën druché l pom “Select”. La crissa di programs scumëncia automaticamënter (n vëij la scrita “Scanning” o “Auto Scan”).
  • Da ne desmincë no ie i poms de programazion che muessa do la crissa inò unì ocupei. Per chësc fin inò crì ora l program che n uel y pona tenì drucà l pom de memorisazion curespundënt (per l solit vëniel mustrà su “Preset Stored”).
Ce programs DAB/DAB+ possi pa audì tl Südtirol?

Sot a www.ras.bz.it/radio pudëis udëi ce programs che n possa audì te ce raions. Pervia che la rëies vën slargedes, cunsions, sce n cajo, de fé na crissa de programs nueva.

Cie uel pa dì DAB?

L ie n’abreviazion de “Digital Audio Broadcasting” y l ie l standard radio digitel nuef che dëssa tl daunì sostituì l radio analogh che ie n funzion da 90 ani incà. Pra la familia DAB toca nce l DMB (Digital Mobile Broadcast) che se stiza sun la tecnologia DAB y che ie unit svilupà dantaldut per l trasferimënt de seniai video y cuntenuc multimediai sun njins de rezezion mubii. DMB vën belau mé adurvà tla Corea.

Cie uel pa dì DAB+?

L ie l DAB standard svilupà inant che cuntën na cumprescion de dac audio plu efizienta (de n 30-50 %) y na miëura cumedura de fai (bonamënter tl mumënt una dla miëures). Cunfruntà cun l DAB àl n livel de desturb plu bas y arjonj cun la medema o na miëura cualità de tonn na majera distanza geografica.

Ce radio adrovi pa per DAB/DAB+?

N adrova n radio digitel nuef che sibe bon de sustenì l DAB+. Chësc possa dlongia l DAB n generel nce rezever UKW y d’autri standarc (miec n rezevitëur multinorma).

Possa pa mi radio DAB unì ajurnà a n radio DAB+?

Sce l ne ie nia udù danora espressamënter dal produtëur (tres na update dla software, n code de ativazion o n modul de njonta) ne iel nia puscibl. DAB+ ie alincontra for cumpatibl ju de viers dl DAB.

De ce frecuenzes se nuza pa DAB/DAB+?

Tl’ Europa va la frecuenzes da 174,928 MHz a 239,200 MHz, aldò dl bloch 5A nchin 13F tl raion VHF- (vëta III)

Possi pa audì cun DAB/DAB+ duc i programs che é audì nchin śën?

Pervia che l se trata pra i aparac radio digitei nueves la majera pert de “rezevitëures multinorm” possen audì chisc programs – sce i ie atifs – tres DAB/DAB+ o sciche dant tres la vëta UKW/FM (analoga).

Possen pa cun DAB/DAB+ audì “Dolby Surround”?

Sci, cun l standard nuef DAB+ ie chësc puscibl sce l “Dolby Surround” ie cuntenì tl program.

Possen pa nce audì DAB/DAB+ t’auto?

Sci, dlonch ulache l ie n senial DAB y sce n à tl auto n aparat de rezezion DAB/DAB+ adatà (cun l’antena spezifica).

Passa pa mi DAB/DAB+ autoradio, sce l ne ie degun senial, automaticamënter al UKW/FM?

Sci, sce l program possa unì audì sun na frecuenza auternativa. L radio t’auto passa pona automaticamënter o a n auter DAB-bloch o a UKW/FM. Te chësc cajo iel suvënz da audì n spustamënt lesier tl tëmp. Pra n valgun aparac muessen ativé manualmënter chësc passaje (funzion follow).

Possi pa rezever DAB/DAB+ nce tres l’antena de cësa?

Miec vala cun l cunliamënt “HDMI” che possa trasferì na cuantità de dac nchin 5 GBit/s. Cunliamënc “DVI” o “YUV” possa trasferì na mëndra cuantità de dac y à na funzion limiteda.

Ce rates dac à pa i programs DAB/DAB+ dla RAS?

Nosc programs DAB vën tl mumënt trasmetui, aldò dl cuntenut dl program, cun na cumpëida de dac da 64 nchin 192 kbit/s (DAB) y 64 kbit/s (DAB+).

Possen pa audì i programs DAB/DAB+ dla RAS dlonch y debant?

Sci, sce la luegia ie curida. Nfurmazions y chertes che mostra la curida di raions ie tlo.

Ce vantajes à pa l DAB y l DAB+ sce cunfruntei cun l radio analogh?

  • Na majera ufierta de programs
  • Pra la rezezion deguna fueres de desturb
  • Audio te na cualità de tonn semienta a chël de na CD
  • Servijes de njonta multimediai sciche tesć, dac y imajes
  • EPG (indesc eletronich di programs)
  • Sauridanza de nuzeda
  • Dolby Surround pra DAB+
  • Updates automatics dla software
  • Efizienza scialdi bona dl’energia (l “Green Radio” nuef)
  • Un n canal de rezezion per dut l raion de curidura (cun funzionamënt SFN), chësc uel dì sparani de frecuenzes
  • Interatività pra DAB+, i servijes de njonta possa unì crisc ora y cherdei ju a na maniera seletiva
  • Njinià per la ntegrazion internet de DAB+
Ciuni ie pa i servijes de njonta de DAB y DAB+?

Pra l DAB+ à la emitëntes la puscibltà de cuncé ite tl program servijes de njonta defrënc. N defrenziea danter la nfurmazions de njonta liedes al program (PAD) y la nfurmazions de njonta nia liedes al program (NPAD). N valgun ejëmpli ie:

  • Album Cover (SLS)
  • Song Title (DLS/DLS+)
  • Nterprec (DLS/DLS+)
  • Moderadëur (DLS/DLS+)
  • Ghesć tl studio (DLS/DLS+)
  • Tabeles de sport (Journaline)
  • Chertes meteo (Journaline)
  • Comunicazions de finanza (Journaline)
  • Andamënc dla borsa (Journaline)
  • Cherdedes de prëscia y servijes de crissa (Announcements)
  • Nutizies curtes y tituli (Journaline)
  • Download y compra de files de mujiga (BWS)
  • Pool de publizità cun puscibltà de compra direta (BWS)
  • Nfurmazions de trafich ampliedes , nce per sistems de navigazion (TPEG)
  • Nfurmazions de program, cun votazion direta (Radio VIS)
  • Slide Show, cun puscibltà de cunseniazion ndividuela de imajes (SLS)
De ce codificazions audio se nuza pa l DAB y l DAB+?

DAB se nuza dl MPEG 1 Layer 2 cun n CRC-Block-Coder linier (cun coefizient 2 Bit per l polynom). L DAB+ se nuza dl MPEG 4 HE AAC v2 cun Reed Solomon-Block-Coder linier (cun coefizient 8 Bit- per l polynom).

Possen pa cun i aparac DAB/DAB+ nce scuté su l webradio?

L ie de plu sortes de “aparac multinorm” che à ntegrà l webradio. Ma pra chisc iel de bujën de n cunliamënt internet stabil (LAN, WLAN, cherta-SIM cun dac flatrate o hotspot).

Possen pa cun i aparac DAB/DAB+ nce registré trasmiscions?

Sci, l ie aparac defrënc pra chëi che n possa, cun na cherta de memorisazion, na tlé USB o n njin de memorisazion fis ntegrà tò su programs, i scuté su y i mené de reviers o inant.

Auden pa l DAB/DAB+ miec che l radio analogh?

Do na lingia de tests ie i scutadëures a una che n aud miec l radio cun l sistem DAB+ y chël dantaldut tl cajo de na rezezion mubila. De mpurtanza ie n “codec audio” de cualità auta (MPEG 4 HE AAC v2), l’assënza de nfluenzes de desturbs analogs (rauscé, sëuraposizions, desturbs de intermodulazion y nsci inant) y la frecuenzes ampliedes (20 kHz contra i 15 kHz dl UKW/FM.

Iel pa pra i rezevitëures DAB/DAB+ defrënzies de cualità?

Sci, n à usservà na lingia de defrënzies n cont dla sensibltà de rezezion y dla stabilità di programs.

Porta pa la tecnica DAB/DAB+ pro a fé avané l eletrosmog?

No, ajache chësta tecnica de trasmiscion digitela nueva se damanda na mëndra capazità de trasmiscion per arjonjer na rezezion scialdi bona.

Cie ie pa DAB-Multiplex?

Sciche pra la televijion digitela DVB-T vën nce pra l DAB/DAB+ de plu programs trasmetui te n multiplex, ënghe tlamà “ensemble” o “bloch”. Per l solit vëniel tres n ensemble o bloch trasmetù 8 programs pra l DAB y danter 12 y 16 programs pra l DAB+, cun n plu la nfurmazions de njonta. N multiplex adrova na larghëza de vëta de 1,54 MHz, n program UKW/FM alincontra 0,3 MHz.

Can unirà pa bonamënter destudà l radio analogh?

La Norvegia destuda sciche prim paesc l UKW/FM cun la fin dl ann 2017. La Svizera scumëncia dal 2020 a destudé l UKW/FM (l passaje dëssa vester cumpletà nchin dl 2024). La Gran Bretania destuda l UKW/FM danter l 2017 y l 2022. La Germania destuda l UKW/FM tl 2025, sce i studesc de fatibltà ie positifs tl 2020 y 2023. Di autri stac europeics ne iel tl mumënt mo deguna nfurmazions cuncretes. Perchël ne iel ënghe da pert dla RAS atualmënter degun plans de destudeda.

Ihr Browser wird nicht unterstützt!

Sie benutzen einen veralteten Browser, für den unsere Website nicht optimiert ist. Bitte installieren Sie einen der folgenden Browser: