Do 50 ani de trasmiscion tres UKW, vëniel cun l radio digitel DAB purtà ite na tecnologia de radio nueva defin. Dlongia l gran plajëi de pudëi scuté su te na cualità (belau) sciche sun na CD, cie che ie de nteres per i ntusiasć dl HiFi, pieta l DAB si majeri vantajes tla rezezion mubila. L rausciamënt y i desturbs ncompri tres d’autra stazions de trasmiscion ie na cossa dl passà. Canche n furnea ne iel nia plu de bujën de crì y de mudé canal sun n’autra frecuenza, ajache pra DAB lëura duta la stazions radio sun la medema frecuenza: Vo sentëis t’auto, mpiëis l radio, chirëis ora la stazion che ulëis y la audiëis tan adaut che ulëis y tla miëura cualità.
Dlongia chësta gran cumpeida de programs radio, devënta l sistem – DAB nteressant pervia de si servisc de dac. Cie che fova mé n pert mesun cun l UKW-RDS, possa śën unì nuzà deplën. Nscila possel unì mandà ora cun uni program radio mò d’autra nfurmazions y dac, sciche p. ej. l titul dla ciantia che n aud, l inuem dl ciantarin, nfurmazions n cont dla CD, n cheder dl program, chedri dl studio de trasmiscion y n. i.
La majera inuvazion ie chëla che l vën mandà ora n canal de dac ndependënt dai programs sun chël che l vën danter l auter slargià ora nfurmazions dla rë zivica dl Südtirol.
Y ajache rujenon iust di vantajes dl DAB ne pudons nia lascé ora la scunanza dla natura, che nes sta a cuer, ajache cun l DAB vëniel mandà ora cun un n trasmitënt bën ot programs (16! n DAB+) che adrova oradechël scialdi manco energia eletrica, ajache l ne ie nia de bujën de na putënza tan granda. L ie tler che chësc nes fej nia mé sparanië energia, ma nce scioldi. Sëuraprò adrova la stazion de trasmiscion mé na lerch de 1,5 MHz per trasmëter duc i programs y i dac. Per n cunfront: per ot programs UKW, zënza trasmiscion de dac, adroven na lerch de 2,4 MHz. Sce n ti cëla al bilanz dl’energia, po vëijen che na rë DAB cun n refurnimënt plën te n raion adrova tl cunfront cun na medema rë UKW mé ntëur ¼ dl’energia.