Rezezion tres satelit

Sce stajëis te n raion dl Südtirol ulache ne udëis nia i programs trasmetui dala RAS tres rezezion terestra iel la puscibltà de giapé i seniai tres l satelit.

Sce stajeis tl Südtirol te n raion che ie tla d’umbria dl’alimentazion televijiva terestra eis rejon a na cherta digitela-SAT dl ORF. Te chësc cajo messëis fé na dumanda scrita (fax o email) ulache dajëis sëura vosta adres y vosc numer de telefonn. Pernan che ëis dat inant vosc dac giapëis da ORF DIGITAL n formuler de apusteda y i dac dl cont per paië la chëuta dla cherta y dl’ativazion. Chësta chëuta fej ora 18,00 € y ie da paië canche la cherta digitela-SAT dl ORF vën apusteda. Do che ORF DIGITAL à giapà l formuler scrit ora y sotscrit ve unirà la cherta mandeda per posta.

 

L rezetëur sateliter digitel de ORF DIGITAL che ie de bujën muessa sustenì l sistem de decodificazion Irdeto. Per uni familia vëniel menà al plu 2 chertes digiteles-SAT dl ORF. Per chertes n plu iel debujën de na mutivazion scrita.

 

DA MËTER VERDA: La chertes digiteles-SAT dl ORF ne possa nia unì menedes te posć de vacanza, te segonda cëses ora dla provinzia, sce n uel abiné programs locai dl ORF te paejes singui, sce n uel abiné i canai ORF III, ORF Sport Plus, ATV, ATV 2, Puls 4 o l program ORF-HD!
La cundizion per giapé na cherta digitela-SAT dl ORF ie che i programs dl ORF tl Südtirol ne vën nia bele abinei tres n’antena per la televijion terestra.
Satelit: ASTRA, Posizion: 19,2° OST, 12692 – H – 22000 – 5/6

 

Da agost 2015 possen udëi i programs locai ORF dai Bundesländer defrënc tres satelit.

Sce stajeis tl Südtirol te n raion tla d’umbria dl’ alimentazion televijiva terestra eis la rejon de giapé na cherta de decodificazion “sat access” (HOTBIRD, Posizion: 13,0°). Per giapé i programs televijifs svizeri adurveis n rezetëur sateliter digitel per chël che l vën udù danora l sistem Viaccess. Nce te chësc cajo adurvons vosta adres per ve mené l formuler de dumanda per la cherta de decodificazion. L formular scrit ora ie pona da mandé ala SRG. I cosć per la cherta fej ora un n iede sëul 75 CHF per l’ativazion y na chëuta al ann de CHF 25. Per uni familia vëniel mandà al plu 2 formuleres de dumanda. Per giapé plu chertes iel debujën de na mutivazion scrita.

Vel’ trasmiscions sciche p.ej. cërta manifestazions sportives o films dla RAI y dla emitëntes privates talianes ie codifichedes sun l satelit (Hotbird – 13,0° Ost). Sce stajëis te n raion da d’umbria dla curidura terestra dl Südtirol àn la puscibltà de rezever chisc programs debant tres la plataforma satelitera “tivùsat”. L’ aparat de rezezion cun la cherta de decodificazion curespundënta ie da cumpré tla butëighes spezialisedes. Duta la nfurmazions plu ala menuda ie da giapé sun la plata de “tivùsat” sot a www.tivusat.tv.