La RAS mana fora te dut Südtirol chisc programs

radio

televijiun

Anter la Provinzia de Bulsan-Südtirol y les istituzions de radio dl ORF, ZDF, SRG y ARD él bele tl 1974 vegnù sclut ju n valgunes convezions. Les convenzions veid dant che chestes istituzions de radio met a desposizion si programs debant per i deraié fora te dut Südtirol.

I segnai de chisc programs vegn emanés da si paisc de ciasa tres les stazions radio dl Patscherkofel y dla Hohe Scheibe (Val Sarentin) fin pro la stazion radio zentrala dl Penegal y da iló végnei menés inant y deraiés fora tres na rei de trasmitenc te dut l raion de Südtirol.

La emanazion de programs vegn fata tl medem moment y zenza valch mudazion; chel uel per ejempl dì che an pò vedei dutes les trasmiscions dl ORF1 te Südtirol tl medem moment sciche tl’Austria te dut si contenut (con i retlams leprò).

Sun la basa de na convenzion anter la RAI y la RAS dl 1975 met la RAI a desposizion sies lueges de trasmiscion a la RAS y la RAS met endò sies lueges de trasmiscion a desposizion a la RAI per les podei nuzé deberieda. Tres chesta convenzion él vegnù sparagné speises de investizion y la planificazion dla rei de trasmiscion fova scialdi plu saurida da mete a jì.

Les lueges de trasmiscion dla RAS vegn souraprò ciamò adoredes da d’autri servisc de interes publich, sciche per ejempl da la protezion zivila, da la polizia, da la verdia de finanza, dal militer, dai servisc de telefon funch y e. i.

Dal 1994 incà vegn la conduta a cercl dla stazion radio (Richtfunkringleitung) de Bulsan – Dispruch – Bulsan – Trent, che é vegnuda metuda su da la RAS deberieda con l ORF y la RAI, ence adoreda per l barat de programs soura i confins fora. Chest barat vegn ghiré dai paisc de Südtirol, Trentin, Tirol y dal Vorarlberg sun la basa de dezijions di Conseis Provinziai che ai à deberieda, l ensci nominé "Accordino", y dl Consei a Cater , l „Vierer-Landtag“.

La RAS à da pert dla Provinzia de Bulsan y do entenuda con l Ministere dles Comunicazions souraprò ciamò la enciaria de mete su infrastrutures per servisc radio publics, servisc funch de interes publich y stazions radio privates. Sciche pruma infrastrutura é tl ann 1999 jù en doura l implant „Mut“ soura Dorf Tirol.

Sun enciaria dla Provinzia de Bulsan y tres na colaborazion anter la RAS, la RAI, l radio de Bayern, l „Bayerischer Rundfunk“ y l Ministere dles Comunicazions, él tl 1999 ciamò vegnù realisé l projet pilot DAB Südtirol sciche prum dla Talia.