Vantajes dl DAB

L davegnì é digital!
Do 50 agn de emanazion con UKW, végnel con l radio digital DAB porté ite na tecnologia de radio defin nueva. Dlongia l gran plajei de podei scuté su te na cualité (belau) sciche sun na CD, cie che é de interes per entusiasć de HiFi, pita DAB si majeri vantajes tla rezezion mobila. L rausciament y i desturbs incompri tres d’autres stazions de trasmiscion é na cossa dl passé. Al ne va nia plu debujegn de chirì y de mudé canal sun n’autra frecuenza entan l viade, ajache pro DAB laora dutes les stazions radio sun la medema frecuenza. Vos senteis ite tl auto, empieis l radio, chireis fora la stazion che voleis y audieis chesta tant adaut che voleis y tla mioura cualité.

Dlongia chesta gran cumpeida de programs radio, deventa l sitem - DAB interessant tres si servisc de dac. Cie che fova demé en pert meso con UKW-RDS, pò sen vegnì nuzé deplen. Enscila pòl vegnì emané con vigni program radio ciamò d’autres informazions y dac, sciche p. ej. l titul dla ciantia che an aud, l inom dl ciantarin, informazions n cont dla CD, n cheder dl program, chedri dl studio de trasmiscion y e. i.

La majera inovazion é chela che al vegn emané n canal de dac independent dai programs (Pretio-Data), sun chel che al vegn anter auter slarié fora informazions dla rei zitadina de Südtirol. Per cerne la plata Internet adoreise tl auto n radio con luegia de tai (Schnittstelle) „Bluetooth“ per podei l taché ite te n „Handheald-PC“. Con chest podeise dapò chirì fora deplù dac sciche tl Internet y eis tresfora „dant man“ les informazions plu atuales.

Y ajache son iust tl laour de cumpedé su i vantajes y la sconanza dla natura nes sta a cuer, ne podonse nia desmentié che con DAB végnel emané con un n trasmitent ot programs (16! in DAB+) che adora souraprò scialdi manco energia eletrica, ajache al ne va nia debujegn de tant na gran forza. Al é saurì da entene che chest nes lascia nia demé sparagné energies, ma ence scioldi. Souraprò adora la stazion de trasmiscion demé na lerch de 1,5 MHz per emané duc i programs y i dac. Per fé n confront adòren per ot programs UKW, zenza emanazion de dac, na lerch de 2,4 MHz. Sce an ti ciala al bilanz dla energia, dapò veiden che na rei DAB con n reforniment plen te n raion adora tl confront con na medema rei UKW demé entourn ¼ dla energia.