Storia

La RAS, Radio - Azienda Südtirol, é vegnuda metuda su tl ann 1975 sciche servisc de radio publich dla Provinzia de Bulsan y à perchël da ti sté do a na enciaria de utl a duta la comunité. Si prum dovier é de emané i programs radio y televijion dal raion cultural todesch y ladin te dut Südtirol. Per chest fin à les istituzions de radio publiches de dert dl’Austria, dla Germania y dla Svizra metù a desposizion debant si programs. I programs de televijion dl ORF1, ORF2 y dl ZDF vegn emanés soura duta la Provinzia, tla pert ozidentala de nosc paisc y tles valedes ladines ence l SF1 y tla pert orientala dl paisc mo l ARD. Souraprò végnel ciamò emané te duta la Provinzia i programs radio Ö1, Ö2 y Ö3 dl ORF y l Radio Rumantsch dla stazion SRG tla valedes ladines y tla Val Venuesta Auta.

I programs radio dl ORF, Ö1, Ö2, Ö3 y FM4, chi dl Radio de Bayern, l „Bayerischer Rundfunk“, B1, B2, B3, B4 y B5, sciche ence i programs dla stazion radio dl SRG Rumantsch y Swiss Jazz, vegn bele emanés tla tecnica digitala (DAB = Digital Audio Broadcasting) y chel soura duta la Provinzia.

Tl davegnì arà la RAS da ti jì encontra a ciamò d’autres endesfides tecniches. Chel vuel dantaldut dì l mudé fora dla tecnica analoga de emané programs con chela digitala – la televijion digitala DVB y l radio digital DAB se sparpagnarà ti agn che vegn dassen fora. Souraprò él de gran interes per la Provinzia de slarié fora les stazions de trasmiscion che an à deberieda y che pò vegnì adoredes da la RAS, la RAI, da Radios privac, servisc de radio provinziai y da firmes per telefons zelulars; tres chel déssel ence vegnì laoré de contra a la costruzion de antenes de trasmiscion souramenedes.

Una dles fondamentes de majera emportanza tl’ativité dla RAS, fova, y l é ciamò encuei, la cooperazion stabla con i enc radio publics sciche l ORF, l ZDF, l SRG y l ARD, desche ence con la RAI y l Ministere dles Comunicazions. Dlongia pro ne végnel perchel nia desmentié l dialogh costrutif con chi che met a jì programs privac.